
Amasomo yo ku cyumweru cya III Gisanzwe. Umwaka wa Liturujiya C
( Icyumweru cyahariwe gusoma Bibiliya )
Amasomo:
Neh 8, 1-4a.5-6.8-10
Zab 19 (18)
1Kor 12, 12-30
Lk 1, 1-4; 4, 14-21
ISOMO RYA MBERE
Isomo ryo mu gitabo cya Nehemiya (Neh 8, 1-4a.5-6.8-10)
Hari mu mboneko z’ukwezi kwa karindwi,
1 maze imbaga yongera gukoranira ku kibuga cy’imbere y’Irembo ry’Amazi, bose bashyize hamwe. Nuko babwira Ezira umwanditsi, ngo azane igitabo cy’Amategeko ya Musa, Uhoraho yari yarahaye Israheli.
2 Ezira umuherezabitambo, azana igitabo cy’Amategeko imbere y’ikoraniro ryose. Kuri uwo munsi wa mbere w’ukwezi kwa karindwi hari hateraniye abagabo, abagore, mbese n’abandi bose baciye akenge.
3 Nuko kuva mu museke kugeza ku manywa y’ihangu, Ezira asomera icyo gitabo aho ku karubanda imbere y’Irembo ry’Amazi, hateraniye abagabo, abagore, mbese n’abandi bose baciye akenge. Imbaga yose yari yitonze, bateze amatwi igitabo cy’Amategeko.
4a Umwanditsi Ezira yari ahagaze ahantu hirengeye bari bamuteguriye bakoresheje ibiti.
5 Ezira abumbura igitabo bose bamureba, kuko aho yari ahagaze yabasumbaga uko bangana, maze akimara kukibumbura imbaga yose irahaguruka.
6 Ezira abanza gushimira Uhoraho, Imana y’Igihangange, maze imbaga na yo ishyira amaboko ejuru, bose bakikiriza icyarimwe bati “Amen! Amen!” Nuko barunama bapfukamira Uhoraho, bubitse uruhanga ku butaka.
8 Ibyo Ezira yamaraga gusoma mu gitabo cy’Amategeko y’Imana, yabihinduraga mu rurimi rwa bose kandi akabibasobanurira, maze bakabyumva.
9 Nuko (Nehemiya, Umunyacyubahiro,) Ezira umuherezabitambo n’umwanditsi, hamwe n’Abalevi basobanuriraga rubanda, babwira imbaga bati “Uyu munsi weguriwe Uhoraho Imana yanyu! Mwigira agahinda nk’aho mwapfushije kandi mwirira!” Koko kandi imbaga yari yamaze kumva ayo magambo, maze bose baraturika bararira.
10 Ezira arongera arababwira ati “Nimugende murye inyama z’amatungo y’imishishe, munywe n’inzoga ziryohereye kandi musangire n’abatagize icyo bategura; kuko uyu munsi weguriwe Nyagasani. Ntimugire agahinda, kuko ibyishimo by’Uhoraho ari byo buhungiro bwanyu.”
Iryo ni Ijambo ry’Imana.
ZABURI (Zab 19 (18), 8, 9, 10, 15)
Inyik/Ibyishimo by’Uhoraho ni byo buhungiro bwacu.
Itegeko ry’Uhoraho ni indakemwa,
rikaramira umutima.
Amabwiriza y’Uhoraho ni amanyakuri,
abacisha make akabungura ubwenge.
Amateka y’Uhoraho araboneye,
akanezereza umutima;
amategeko y’Uhoraho ni uruhehemure,
akamurikira umuntu.
Igitinyiro cy’Uhoraho kiraboneye,
kigahoraho iteka ryose.
Ibyo Uhoraho yemeje ni amanyakuri,
byose biba bitunganye.
Amagambo mvuga n’ibyo umutima wanjye uzirikana,
nibijye bikunogera, wowe Uhoraho,
Rutare nisunga n’umurengezi wanjye!
ISOMO RYA KABIRI
Isomo ryo mu ibaruwa ya mbere Mutagatifu Pawulo Intumwa yandikiye Abanyakorinti (1Kor 12, 12-30)
Bavandimwe,
12 mu by’ukuri umubiri ni umwe kandi ugizwe n’ingingo nyinshi; ariko izo ngingo zose n’ubwo ari nyinshi zigize umubiri umwe: ni ko bimeze no kuri Kristu.
13 Twese twabatirijwe muri Roho umwe ngo tube umubiri umwe. Twaba Abayahudi cyangwa Abagereki, twaba abacakara cyangwa abigenga, twese twuhiwe Roho umwe.
14 Koko rero umubiri ntugizwe n’urugingo rumwe gusa, ahubwo ugizwe na nyinshi.
15 Niba ikirenge kivuze kiti “Niba ntari ikiganza nta ho mpuriye n’umubiri”, byakibuza kuba urugingo rw’umubiri?
16 Niba ugutwi kuvuze kuti “Ubwo ntari ijisho nta ho mpuriye n’umubiri”, byakubuza kuba urugingo rw’umubiri?
17 Niba umubiri wose ubaye ijisho, kumva byaherera he? Niba byose bibaye ugutwi, uguhumurirwa kwaherera he?
18 Noneho rero Imana yagennye umwanya wa buri rugingo mu mubiri uko yabyishakiye.
19 Yabaye byose byarabaye urugingo rumwe, umubiri wari kuba he?
20 Ingingo rero ni nyinshi, ariko umubiri ukaba umwe.
21 Ijisho ntirishobora kubwira ikiganza ngo “Singukeneye”, n’umutwe ngo ubwire ibirenge uti “Simbakeneye”.
22 Byongeye kandi n’ingingo zisa nk’aho ari nta ntege na zo ziba ngombwa,
23 ndetse n’izo dukeka ko zisuzuguritse ni zo twubaha cyane, maze izirusha izindi gutera isoni tukarushaho kuzubahiriza.
24 Naho ingingo zacu zisanzwe, ntizijya ziduhangayika. Cyakora Imana yateye umubiri ku buryo buha icyubahiro ingingo zari zitacyifitemo,
25 ari ukugira ngo umubiri utibyaramo amakimbirane, ahubwo ingingo zose zibe magirirane.
26Niba hari urugingo rubabaye, izindi zose zisangira ako kababaro; niba hari urugingo rumerewe neza, izindi na zo zirishima.
27 Namwe rero muri umubiri umwe ari wo Kristu, kandi mukaba ingingo ze buri muntu ku giti cye.
28 Bityo rero abo Imana yashyizeho muri Kiliziya, aba mbere ni intumwa, aba kabiri ni abahanuzi, aba gatatu ni abigisha. Hanyuma ikurikizaho abakora ibitangaza; abafite ingabire yo gukiza abarwayi, iyo gutabarana, iyo kuyobora n’iyo kuvuga mu ndimi.
29 Mbese bose ni intumwa? Bose se ni abahanuzi? Cyangwa ni abigisha? Mbese bose bakora ibitangaza?
30 Cyangwa bafite ingabire yo gukiza? Bose se bavuga mu ndimi? Cyangwa bose bazi kuzisobanura?
Iryo ni Ijambo ry’Imana.
IBANGO-NDIRIMBO RIBANZIRIZA IVANJILI (Lk 4, 18)
Alleluya Alleluya.
Nyagasani yohereje Yezu Umugaragu we,
kugeza Inkuru Nziza ku bakene,
no gutangariza imbohe ko zibohowe.
Alleluya.
IVANJILI NTAGATIFU
Intangiriro y’Ivanjili Ntagatifu uko yanditswe na Mutagatifu Luka (Lk 1, 1-4; 4, 14-21)
1,1 Ubwo benshi batangiye kwandika barondora ibyabaye muri twe,
2 mbese nk’uko twabigejejweho n’ababyiboneye kuva mu ntangiriro, ari na bo bari bashinzwe kwamamaza ijambo ry’Imana,
3 nanjye maze kubaririza neza uko byagenze kuva bigitangira, niyemeje, nyakubahwa Tewofili, kukwandikira ayo mateka nyakurikiranyije,
4 ngo umenye nyakuri ukuntu inyigisho washyikirijwe zihamye.
4,14 Nuko Yezu asubira mu Galileya yuzuye ububasha bwa Roho Mutagatifu, aba ikirangirire mu gihugu cyose.
15 Yigishirizaga mu masengero yabo, maze bose bakamushima.
16 Hanyuma ajya i Nazareti aho yari yararerewe, maze nk’uko yabimenyereye yinjira mu isengero ku munsi w’isabato; nuko arahaguruka ngo asome Ibyanditswe bitagatifu.
17 Bamuhereza igitabo cy’umuhanuzi Izayi, arakibumbura abona ahanditse ngo
18 “Roho wa Nyagasani arantwikiriye,
kuko yantoye akansiga amavuta,
agira ngo ngeze Inkuru Nziza ku bakene,
ntangarize imbohe ko zibohowe,
n’impumyi ko zihumutse, n’abapfukiranwaga ko babohowe,
19 kandi namamaze umwaka w’impuhwe za Nyagasani.”
20Y ezu abumba igitabo, agisubiza umuhereza maze aricara. Mu isengero bose bari bamuhanze amaso. 21Nuko atangira kubabwira ati “Ibiri mu isomo mumaze kumva, mumenye ko byujujwe uyu munsi.”
Iyo ni Ivanjili Ntagatifu
SHALOM. URANTUNGURA!
Mpora ntangarira Imana kubera urukundo rwayo.
Rubeshaho intungane n’umunyabyaha.
Rugera kure tutazigera tugeza amaso.
Rurihangana rukantegereza.
Ruhora ari rushya kandi buri wese akaruryaho nk’aho ari we wenyine rwitaho.
Rugera ku munyantege nke rukamuhagurutsa.
Yewe mpora ntangara kuko ntungurwa ni uko ibyiza mpabwa nzi neza ko ntabikwiye.
Nawe kandi ni uko ukunzwe nk’ikinege imbere y’Imana.
Uhorane ibyiza byayo.
Ikumurikire kandi umugisha wayo uguhoreho.
Kibondo cyanjye nguhaye umugisha wa kibyeyi.
Urakabaho.
Sr Immaculée Uwamariya
(25/1/2025)
SHALOM. BABWIRE!
Ntuzaceceke kandi hari abatarumva.
N’ubwo hashize igihe kinini abantu barabwiwe amategeko y’Imana siko bose bayakurikiza.
Hari abayahinyura.
Hari abumva ntibafate.
Hari abanga kumva ngo badakira.
Hari abayangisha abandi.
Hari n’abatarabona ubabwira.
Ntukavuge rero ngo wabuze umwanya wo guhamya ukwemera kwawe ahubwo uzavuge ko utaremera kuba igikoresho cy’Imana.
Haguruka utangarize bose ijambo ryayo wumvise.
Ikumurikire kandi umugisha wayo uguhoreho.
Urakabaho.
Tuzirikane amasomo yo ku wa 26/1/2025
Neh 8, 1-4a.5-6.8-10
Zab 18
1Kor 12, 12-30
Lk 1,1-4; 4, 14-21
Sr Immaculée Uwamariya